Лабараторыя генетычных бiятэхналогiй

Лабараторыю генетычных бiятэхналогiй адкрылi у́ Мiнску

Лабараторыя генетычных біятэхналогій адкрылася ў РНПЦ дзіцячай анкалогіі, гематалогіі і імуналогіі

Лабараторыя дазволіць увесці ў практыку новыя малекулярна-генетычныя метады дыягностыкі і лячэння анкагематалагічных захворванняў у дзяцей. Тут будуць праводзіць навуковыя даследаванні і ствараць інавацыйныя тэхналогіі.
Як адзначыў на ўрачыстым мерапрыемстве міністр аховы здароўя Валерый Малашка, адкрыццё гэтай высокатэхналагічнай лабараторыі сведчыць аб тым, што ў Беларусі клапоцяцца пра будучыню дзяцей. «Мы шукаем новыя віды лячэння і дыягностыкі анкалагічных захворванняў. Прыемна, што ў ахове здароўя дзяцей адбываюцца прарывы дзякуючы людзям, якія прысвячаюць жыццё барацьбе з ракам,» - сказаў ён.
Лячэнне анкалагічных захворванняў, навуковыя даследаванні ў гэтай галіне ва ўсім свеце абыходзяцца вельмі дорага. Выкарыстоўваючы толькі бюджэтныя сродкі і рэсурсы страхавых фондаў складана было б развіваць такія высокатэхналагічныя цэнтры, падкрэсліў міністр. На шчасце, адгукнуліся многія неабыякавыя людзі, якія інвеставалі сродкі ў новы напрамак медыцыны. Асноўным спонсарам стаў Белаграпрамбанк, які выдзеліў на будаўніцтва лабараторыі каля 80% сумы.
«Калісьці даўно Вольга Алейнікава падзялілася з кіраўніцтвам банка сваёй марай пра будаўніцтва лабараторыі. Гаворка ішла пра надзею, якую мы проста абавязаны падарыць нашым дзецям. Надзею на самае каштоўнае - жыццё. Банк прыняў прынцыповае рашэнне адшукаць усю неабходную для будаўніцтва лабараторыі суму», - распавёў першы намеснік старшыні праўлення ААТ «Белаграпрамбанк» Павел Васілеўскі.
Па словах Вольгі Алейнікавай, «у лабараторыі будуць займацца даследаваннямі геному пухлінавых клетак або клетак крыві для вызначэння мутацый, якія выклікаюць анкалагічныя захворванні, хваробы крыві і спадчынныя захворванні, шукаць прычыны ўзнікнення распаўсюджаных анкалагічных захворванняў і праводзіць даклінічныя выпрабаванні новых метадаў тэрапіі. Сярод задач таксама праца з імуннай сістэмай пацыентаў для барацьбы з пухлінай без дадатковай хіміятэрапіі, распрацоўка метадаў імунатэрапіі, у тым ліку супрацьпухлінных вакцын, CAR-T тэрапіі, тэрапіі натуральнымі кілерными клеткамі ды іншымі клеткавымі прэпаратамі з супрацьпухліннай актыўнасцю».
Чакаецца, што ў поўную сілу лабараторыя запрацуе ў канцы жніўня, а да канца года праз яе пройдуць першыя пацыенты. Па словах Вольгі Алейнікавай, штогод на лячэнне паступаюць 320-350 маленькіх пацыентаў, у якіх упершыню выяўлена анказахворванне. Паказчык выжывальнасці - 74% незалежна ад стадыі хваробы, па некаторых відах раку - да 98%.

Прэс-служба Міністэрства аховы здароўя

995