Першая палата паліятыўнай дапамогі дзецям адкрыта на базе абласнога спецыялізаванага дома дзіцяці для дзяцей з арганічным паражэннем ЦНС і парушэннем псіхікі.

У палаце на 7 ложкаў будуць знаходзіцца пацыенты, якія маюць патрэбу ў штучнай вентыляцыі лёгкіх.

Па паведамленні галоўнага ўрача Алега Стрэбкава, у памяшканні праведзены рамонт, узмоцнена электразабеспячэнне, усталяваны дадатковы генератар на выпадак аварыйнага адключэння.

Сучасныя партатыўныя апараты ШВЛ набыты за кошт абласнога бюджэту. У аснашчэнні палаты паўдзельнічалі таксама жыхары вобласці: падчас дабрачыннай акцыі сіламі юрыдычных і фізічных асоб сабрана больш за 67 000 рублёў. На гэтыя сродкі закуплены спецыяльныя ложкі з электрапрывадамі і супрацьпролежневымі матрацамі, абсталяванне для рэабілітацыі, расходныя матэрыялы.

Дзеці будуць знаходзіцца пад кругласутачным назіраннем медработнікаў. Арганізавана дзяжурства педыятра, рэаніматолага і неўролага.