Меры дзяржаўнай падтрымкі сем'яў, якія выхоўваюць дзяцей, рост дабрабыту грамадзян, даступнасць медыцынскай дапамогі - гэтыя і іншыя пытанні абмеркавалі прэм'ер-міністр Сяргей Румас, кіраўнік Адміністрацыі Прэзідэнта Наталля Качанава, прадстаўнікі зацікаўленых ведамстваў, старшыні аблвыканкамаў і кіраўніцтва Банка развіцця.

Кіраўнік дзяржавы падкрэсліў, што размова павінна ісці аб удасканаленні сістэмы ў цэлым:

— У нас і так ужо дададзена настолькі, што ні адна краіна ў свеце не падтрымлівае так сем'і з дзецьмі, як мы. У нас, па-мойму, да 11 розных дапаможнікаў.

Пры гэтым Прэзідэнт прыводзіць статыстыку іншых краін:

— У Германіі вельмі моцныя выплаты, а нараджальнасць практычна як у Беларусі.

Нагадаем, што для падтрымкі сем'яў з дзецьмі ў Беларусі прыняты выключныя меры. Сярод іх аплачваецца адпачынак па догляду за дзіцем да трох гадоў, льготнае крэдытаванне для шматдзетных і праграма сямейнага капіталу.

— Трэба разабрацца ў самой сістэме падтрымкі сям'і і, магчыма, пераразмеркаваць сродкі якія выдзяляюцца. У тым ліку дробязь, якая не працуе, наогул прыбраць. Да прыкладу, калі мы прымем прыстойнае рашэнне па забеспячэнню шматдзетных сем'яў жыллём, то, натуральна, гэта стымул. А калі вы на санаторна-курортнае лячэнне адпраўляеце і даеце чалавеку тры долары - гэта проста распыляеце грашовыя сродкі. Прырост насельніцтва, павышэнне працоўнага патэнцыялу - пытанне нацыянальнай бяспекі, і для нас ён гучыць так жа востра, як для іншых развітых краін, - канстатаваў Прэзідэнт.

У Беларусі з 2016 па 2020 год дзейнічае дзяржпраграма «Здароўе народа і дэмаграфічная бяспека Рэспублікі Беларусь». Згодна з ёй прадугледжваецца стварэнне ўмоў для паляпшэння здароўя насельніцтва, развіцця і ўмацавання сямейных каштоўнасцяў, павышэння прэстыжу бацькоўства, паляпшэння ўзнаўлення насельніцтва, скарачэння ўзроўню смяротнасці, павелічэння чаканай працягласці жыцця і г. д.

— Трэба надаць увагу фарміраванню ў грамадстве пазітыўнага і паважлівага стаўлення да мацярынства і сямейных каштоўнасцяў, - упэўнены Прэзідэнт.

Як далажыла на нарадзе міністр працы і сацыяльнай абароны Ірына Касцевіч, з 1993 года Беларусь уступіла ў этап дэпапуляцыі: смяротнасць перавышае нараджальнасць. Краіна не ўзнаўляе сваё насельніцтва з 1978 года, калі каэфіцыент простага ўзнаўлення ўпаў ніжэй парогавага значэння.

— Прынятыя на дзяржаўным узроўні меры дазволілі дамагчыся з 2010 года адноснай стабілізацыі дэмаграфічнай сітуацыі. Аднак дадзеная тэндэнцыя не набыла ўстойлівы характар, пра што сведчаць вынікі апошніх двух гадоў. Нараджальнасць зніжаецца, - канстатавала міністр.

У 2018 годзе ў Беларусі нарадзілася менш за 95 тысяч дзяцей, што на 8% менш у параўнанні з 2017-м. Узровень смяротнасці застаецца досыць высокім: у мінулым годзе ў краіне памерлі амаль 200 тысяч чалавек, што на 600 больш, чым у 2017-м. У выніку натуральнае змяншэнне склала больш за 25 тысяч чалавек, павялічыўшыся на 9 тысяч.

Прэзідэнт запатрабаваў пераадолець гэтую негатыўную тэндэнцыю, неабходна разгледзець усе меры, якія дапамогуць палепшыць дэмаграфічную сітуацыю ў краіне.

Па словах міністра аховы здароўя Валерыя Малашкі, сёння да 14% сямейных пар не могуць зачаць дзіця натуральным шляхам. Патрабуецца дапамога сістэмы аховы здароўя. На нарадзе абмяркоўвалася прапанова Міністэрства аховы здароўя - разгледзець магчымасць прадастаўлення сем'ям адной бясплатнай спробы правядзення ЭКА.

— Ёсць прамая сувязь бясплоддзя з узростам і рэпрадуктыўным здароўем не толькі жанчын, але і мужчын. Таму пераарыентуем працу на стварэнне службы ранняга выяўлення і лячэння захворванняў рэпрадуктыўнай сферы ў мужчын, - растлумачыў міністр.

У Беларусі ўкараняюцца сучасныя тэхналогіі і унікальныя метады, якія дазваляюць захаваць ці аднавіць дзетародную функцыю, а таксама спазнаць радасць мацярынства пацыенткам з цяжкімі захворваннямі.

Паводле разлікаў спецыялістаў, правядзенне ЭКА за кошт бюджэтных сродкаў дазволіць з'явіцца на свет ад 1,5 да 2 тысяч немаўлят у год.

Кіраўнік дзяржавы даручыў сістэматызаваць усе напрацоўкі, правесці рэвізію ільгот і яшчэ раз абмеркаваць гэтую тэму на Прэзідыуме Савета Міністраў. Старшыням аблвыканкамаў даручана заняцца гэтай праблемай на месцах з абавязковым прыцягненнем грамадзян, асабліва тых, каго тычацца або могуць закрануць прынятыя і плануемыя меры.

Прэс-служба Міністэрства аховы здароўя