Прэзідэнт Беларусі Аляксандр Лукашэнка падпісаў Указ № 380 ад 25.10.2022, якім унесены змяненні ва Ўказ «Аб фарміраванні цэн на лекавыя сродкі, вырабы медыцынскага прызначэння і медыцынскую тэхніку»№366 ад 11 жніўня 2005 года.

Як растлумачыў сёння журналістам начальнік упраўлення прадпрымальніцкай дзейнасці, цэнаўтварэння і дзяржаўнай маёмасці Міністэрства аховы здароўя Дзмітрый Калістратаў, «Указ Прэзідэнта ўносіць справядлівасць у гэтым пытанні. Раней, у адпаведнасці з мінулай рэдакцыяй Указа Прэзідэнта Рэспублікі Беларусь ад 11 жніўня 2005 г. № 366 суб'екты гаспадарання мелі права павысіць кошты на медыцынскія тавары (па якіх лічылася крэдыторская запазычанасць) у сувязі з ростам курсаў валют у адносінах да беларускага рубля. Цяперашняя рэдакцыя ўказа прадугледжвае ўвядзенне абавязку суб'екта гаспадарання зніжаць кошты ў сувязі са зніжэннем курсаў валют у адносінах да беларускага рубля».

Указ таксама прадугледжвае магчымасць пераацэнкі медыцынскіх тавараў, якія выраблены ў краінах ЕАЭС. «У сувязі з ваганнямі курсу валют увоз медыцынскіх тавараў, вырабленых у краінах ЕАЭС, стварае вялікія рызыкі ўтварэння адмоўных курсавых розніц і страты айчынных імпарцёраў ад рэалізацыі гэтых тавараў. Уведзеная норма дазволіць выключыць дадзеныя рызыкі і забяспечыць насельніцтва асартыментам медыцынскіх тавараў, вырабленых у краінах ЕАЭС, якія часта маюць меншы кошт у параўнанні з аналагічнымі таварамі імпартнай вытворчасці з краін, якія не ўваходзяць у ЕАЭС», – адзначыў Дзмітрый Калістратаў.

Указ прыняты ў мэтах удасканалення цэнавай палітыкі на рынку медыцынскіх тавараў і накіраваны на захаванне асартыменту запатрабаваных лекаў на ўнутраным рынку, забеспячэнне іх даступнасці для насельніцтва і арганізацый аховы здароўя.

Прэс-служба Міністэрства аховы здароўя