Рэспубліканскі навукова-практычны цэнтр (РНПЦ) – гэта арганізацыя аховы здароўя, у якой сканцэнтраваны ўсе віды сучасных медыцынскіх тэхналогій дыягностыкі, аказання спецыялізаванай медыцынскай дапамогі і рэабілітацыі. У РНПЦ актыўна вядуцца навуковыя распрацоўкі новых метадаў дыягностыкі, лячэння і рэабілітацыі профільных захворванняў.

Фактычна гэта самы высокі ўзровень (чацвёрты) аказання медыцынскай дапамогі насельніцтву. Усе РНПЦ падзеленыя па профілі аказання медыцынскай дапамогі і маюць у сваім складзе адпаведную профільную кафедру, супрацоўнікі якой актыўна кансультуюць пацыентаў, якія знаходзяцца на лячэнні ў Цэнтры. Таксама супрацоўнікі РНПЦ праводзяць гігіенічныя і супрацьэпідэмічныя мерапрыемствы па профілі сваёй дзейнасці.

Высокакваліфікаваная медыцынская дапамога ў РНПЦ аказваецца грамадзянам Рэспублікі Беларусь паводле накіравання з мясцовай установы аховы здароўя пры наяўнасці складанага захворвання, якое патрабуе высокатэхналагічных умяшальніцтваў і высокай кваліфікацыі медыцынскага персаналу.