Нарада з удзелам міністра аховы здароўя Дзмітрыя Піневіча і членаў экспертнага савета па імунізацыі адбылася ў Мінску. Члены савета абмеркавалі тактыку правядзення вакцынацыі ад грыпу ў гэтым годзе. Нагадаем, што восенню ў Беларусі традыцыйна праходзіць вакцынацыя ад грыпу. У гэтым годзе яна накладваецца на прышчэпачную кампанію супраць COVID-19.

З улікам пазіцыі Сусветнай арганізацыі аховы здароўя, замежных і айчынных экспертаў па выніках нарады прынята рашэнне аб наступнай тактыцы вакцынацыі: у выпадку неабходнасці правядзення пацыенту вакцынацыі супраць грыпу і COVID-19, рэкамендуецца – першачарговае правядзенне вакцынацыі супраць COVID-19. Вакцынацыю супраць грыпу праводзіць не раней, чым праз 14 дзён пасля завяршэння поўнага курса вакцынацыі супраць COVID-19.

Па жаданні пацыента (у выпадку адсутнасці супрацьпаказанняў) магчыма сумеснае ўжыванне вакцыны ад COVID-19 і вакцыны ад грыпу – за выключэннем жывых вакцын. Сваё жаданне пацыент афармляе пісьмова – падпісваючы інфармаваную згоду.

У нарадзе бралі ўдзел старшыня экспертнага савета, загадчыца кафедры дзіцячых інфекцыйных хвароб БДМУ, д.м.н., прафесар Аксана Раманава, загадчык лабараторыі вакцынакіруемых інфекцый РНПЦЭiМ, д.м.н., прафесар Алена Самойлавіч, загадчык кафедры інфекцыйных хвароб БДМУ, д.м.н., прафесар Ігар Карпаў, загадчык кафедры інфекцыйных хвароб і дзіцячых інфекцый БелМАПА к.м.н, дацэнт Юрый Горбiч, рэктар ГГМУ, д.м.н., дацэнт Ігар Стома і іншыя.

Удзельнікі нарады адзначылі, што вакцынацыя – гэта тая мера, якая дазволіць прадухіліць развіццё цяжкіх выпадкаў, у тым ліку ў некаторай ступені паменшыць магчымасць інфікавання пажылых дарослых людзей ад дзяцей і наадварот. Вакцынаваныя людзі (ёсць некаторыя даследаванні на гэтую тэму), калі яны і захварэлі, то вылучаюць вірус не так актыўна, як гэта адбываецца ў людзей, якія не вакцынаваны. Ёсць верагоднасць таго, што максімальная колькасць вакцынаваных ў арганізаваным калектыве дапаможа прадухіліць развіццё ўспышкі ў гэтым калектыве.

Нагадаем, што першую дозу вакцыны супраць COVID-19 атрымалі 17,6% жыхароў Беларусі. Другой дозай вакцынаваны 14,6%.

Прэс-служба Міністэрства аховы здароўя