Міжнародныя спаборніцтвы «Гран-пры Мінска» па веласіпедным спорце стартавалі сёння на Кастрычніцкай плошчы сталіцы і сталі тэставымі да II Еўрапейскіх гульняў.

За перамогу на дыстанцыі змагаліся больш за 150 удзельнікаў з розных куткоў свету. Веласіпедысты павінны былі пераадолець 10 кругоў па 15 кіламетраў. На кожным крузе спартсменам трэба было прайсці 25 рэзкіх паваротаў. Траса цалкам супадае з маршрутам групавой гонкі спартыўнага форуму, які пройдзе ў чэрвені. І для большасці спартсменаў, якія прыедуць у сталіцу, гэта адзіная магчымасць ўбачыць нюансы дарогі і выбудаваць стратэгію перад спаборніцтвамі.

Як адзначыў першы намеснік міністра аховы здароўя Дзмітрый Піневіч, "правядзенне такіх маштабных мультыспартыўных спаборніцтваў стала своеасаблівай праверкай ўсіх задзейнічаных сфер, у тым ліку сістэмы аховы здароўя. Мы прадумвалі усю лагістыку працы медслужбы з улікам агульнапрынятых стандартаў правядзення міжнародных спартыўных мерапрыемстваў. Сёння самы час ацаніць правільнасць нашай сумеснай працы". Медычнае забеспячэнне удзельнікаў ажыццяўлялася брыгадамі хуткай дапамогі. Тут дзяжурылі спецыялісты, якія адпрацавалі практычныя навыкі па аказанні меддапамогі спартсменам і гледачам. Яны вывучылі магчымыя сітуацыі - аказанне дапамогі ў спаборніцкай зоне і медпункце. Упершыню на трасе быў задзейнічаны дзяжурны фельчар, які ехаў за спартсменамі на матацыкле.

Каардынацыя дзеянняў па аказанні медыцынскай дапамогі ажыццяўлялася праз аператыўны аддзел станцыі хуткай медыцынскай дапамогі. У мерапрыемстве таксама прынялі ўдзел кансультант упраўлення медыцынскай экспертызы міністэрства Іна Вазняк, старшыня камітэта па ахове здароўя Мінгарвыканкама Сяргей Малышка, галоўны ўрач Мінскай гарадской станцыі СМП Аляксандр Жынко і іншыя спецыялісты сістэмы аховы здароўя.

Вольга Аліноўская і Віталь Гіль "Медыцынскі веснік"

Прэс-служба Міністэрства аховы здароўя