На адкрыцці мастацка-гістарычнай выставы «Місія міласэрнасці» ў Нацыянальным мастацкім музеі Беларусі адбылося ўрачыстае ўзнагароджанне работнікаў медыка-сацыяльнай службы.

Узнагароды ўручыў міністр аховы здароўя Валерый Малашка: 3 сёстры міласэрнасці атрымалі знак «Выдатнік аховы здароўя», 8 - Ганаровыя граматы Міністэрства аховы здароўя. Галоўную медыцынскую сястру Рэспубліканскага цэнтра медыцынскай рэабілітацыі і бальнеалячэння, старшыню першаснай арганізацыі Беларускага таварыства Чырвонага Крыжа Галіну Кулагіну ўзнагародзілі медалём Флорэнс Найтынгейл.

– Шматгадовае цеснае супрацоўніцтва звязвае Міністэрства аховы здароўя з Беларускім таварыствам Чырвонага Крыжа, – адзначыў Валерый Малашка. – Мы шчыра ўдзячныя за тыя глабальныя праекты, якія робім разам. За 55 гадоў дзейнасці служба міласэрнасці захавала сябе - і ў яе вялікая будучыня.

Асаблівае месца на выставе займае стэнд лаўрэатаў медалі Флорэнс Найтынгейл - вышэйшай узнагароды для медыцынскіх сясцёр ў свеце. Узнагарода заснавана ў 1912 годзе і прысуджаецца Міжнародным камітэтам Чырвонага Крыжа раз у два гады за выключную прыхільнасць справе міласэрнасці, гуманнасць і ўзорную прафесійную дзейнасць у ваенны і мірны час. Ва ўсім свеце 1 483 лаўрэата медалі. У Беларусі гэтай узнагароды ўдастоены 12 медыцынскіх сясцёр: шэсць – за мужнасць і самаадданасць у гады Вялікай Айчыннай вайны, шэсць - за беззапаветнае служэнне адзінокім пажылым і цяжкахворым людзям у мірны час.

На выставе, прысвечанай медсёстрам і прымеркаванай да 55-годдзя медыка-сацыяльнай службы БТЧК, удзельнікі мерапрыемства пазнаёміліся з карцінамі беларускіх мастакоў з фондаў музея, гістарычнымі архіўнымі дакументамі і фотаздымкамі БТЧК – красамоўнымі сведчаннямі гуманізму, міласэрнасці і самаахвярнасці медыцынскіх сясцёр Беларусі.

Святлана Хорсун, «Медыцынскі веснік».