Навукова-практычная канферэнцыя "Бесперапынная прафесійная медыцынская адукацыя і атэстацыя медыцынскіх работнікаў: сёння і заўтра" пройдзе 18-19 красавіка ў Гомельскім дзяржаўным медуніверсітэце паведаміла дэкан факультэта павышэння кваліфікацыі і перападрыхтоўкі ВНУ Наталля Галіноўская.

Мерапрыемства аб'яднае каля 100 удзельнікаў. У іх ліку - прадстаўнікі ўсіх медуніверсітэтаў і большасці медыцынскіх каледжаў Беларусі, устаноў аховы здароўя, а таксама вядучыя спецыялісты ў галіне медыцынскай адукацыі з Японіі, Літвы, Расіі, Украіны. Прадстаўнікі Іспаніі далучацца да дыскусіі праз тэлемост.

На пленарнай частцы гаворка пойдзе аб інавацыйных падыходах ў вышэйшай медыцынскай адукацыі, мадэлі "Універсітэт 3.0", адукацыйным менеджменце. На форуме абмяркуюць і сусветны вопыт стажыроўкі і паслядыпломнай адукацыі медработнікаў, аспекты прафарыентацыі падлеткаў і моладзі, а таксама атэстацыі, акрэдытацыі і ліцэнзавання ў ахове здароўя і медыцынскай адукацыі.

Праграма канферэнцыі ўключае правядзенне чатырох тэматычных круглых сталоў, якія будуць прысвечаны выкарыстанню сімуляцыйных тэхналогій, пераемнасці ў медыцынскай адукацыі на ўсіх этапах, універсітэцкай клініцы, атэстацыі медработнікаў. Удзельнікі пазнаёмяцца з выставай "Тэхналогіі сімуляцыйнай медыцынскай адукацыі".

Арганізатарамі канферэнцыі выступаюць Гомельскі дзяржаўны медуніверсітэт, Міністэрства аховы здароўя, Міністэрства адукацыі.

БЕЛТА