У Беларусі з афіцыйным візітам знаходзіцца дэлегацыя Міністэрства аховы здароўя Арменіі на чале з кіраўніком ведамства Арсенам Тарасянам. На сустрэчы з кіраўніком беларускага міністэрства Валерыем Малашка Арсен Тарасян адзначыў, што Арменія зацікаўлена пераняць вопыт Беларусі ў галіне транспланталогіі і электроннай аховы здароўя (e-Health).

Арсен Тарасян распавёў, што «Арменія зацікаўлена ў тым, каб вывучыць вопыт Беларусі ў галіне транспланталогіі. Кожны год расце колькасць тых пацыентаў, якія праходзяць гемадыяліз, таму мы зацікаўленыя ў перасадках нырак. Вядома, аперацыі па трансплантацыі печані, сэрца нам таксама цікавыя, але мы разумеем, што павінны пачаць з самага простага».

Яшчэ адна перспектыўная сфера для абмену вопытам - электронная ахова здароўя. Таксама ёсць прапановы па пашырэнні супрацоўніцтва ў плане паставак лекавых сродкаў. У прыватнасці, на сустрэчы размова ішла пра прэпарат для пацыентаў з гепатытам С. У бягучым годзе ў Арменіі плануецца пачаць дзяржаўную праграму па лячэнні гэтага захворвання.

У праграме афіцыйнага візіту прадстаўнікоў аховы здароўя Арменіі, які працягнецца з 28 па 30 студзеня, плануецца наведванне РНПЦ дзіцячай анкалогіі, гематалогіі і імуналогіі, РНПЦ анкалогіі і медыцынскай радыялогіі імя Аляксандрава, Мінскага навукова-практычнага цэнтра хірургіі, транспланталогіі і гематалогіі і Беларускага дзяржаўнага медыцынскага універсітэта.

Прэс-служба Міністэрства аховы здароўя