Айчынныя распрацоўкі прапанавалі ў Японіі

Беларуская дэлегацыя на чале з загадчыкам кафедры артапедычнай стаматалогіі і артадантыі з курсам дзіцячай стаматалогіі БелМАПО Сяргеем Рубніковічам узяла ўдзел у Міжнародным стаматалагічным сімпозіўме ў Токіа.

Каля 1 500 стаматолагаў, стаматолагаў-хірургаў, стаматолагаў-артапедаў, сківічна-тваравых хірургаў, а таксама зубных тэхнікаў з 50 краін свету мелі магчымасць атрымаць актуальную інфармацыю па сучасных аспектах тэорыі і практыкі дэнтальнай імпланталогіі.

У рамках сімпозіума беларускія спецыялісты прадставілі айчынныя дасягненні ў сферы стаматалогіі. Прафесар Сяргей Рубніковіч (на здымку) і яго вучні разам з навукова-тэхналагічным паркам БНТУ «Палітэхнік» пры кансультацыйнай дапамозе прафесара Уладзіміра Мінчэні распрацавалі ўльтрагукавы стаматалагічны апарат і тэхналогію па паляпшэнні астэаінтэграцыі дэнтальных імплантатаў — іх высока ацанілі замежныя калегі. Таксама ўзялі ўдзел у спецыялізаваных майстар-класах, правялі шэраг сустрэч з прадстаўнікамі японскіх стаматалагічных клінік.

Пры падтрымцы Пасольства Рэспублікі Беларусь у Японіі і асабіста Надзвычайнага і Паўнамоцнага Пасла Руслана Есіна адбылася сустрэча са старшынёй Таварыства японска-беларускага сяброўства Тацуа Харыаем, падчас якога бакі падзяліліся думкамі пра стан і перспектывы дзвюх краін, у тым ліку развіццё стаматалагічнага турызму.

01.11.2017

1500