У рамках візіту Прэзідэнта Беларусі Аляксандра Лукашэнкі дэлегацыя Міністэрства аховы здароўя на чале з міністрам аховы здароўя Валерыем Малашка знаходзіцца ў Душанбэ.

У складзе дэлегацыі рэктар БДМУ Анатоль Сікорскі, дырэктар РНПЦ траўматалогіі і артапедыі Аляксандр Бялецкі, кіраўнікі фармацэўтычных прадпрыемстваў.

У прысутнасці кіраўнікоў дзяржаў адбылося падпісанне Пагаднення паміж Міністэрствам аховы здароўя Беларусі і Міністэрствам аховы здароўя і сацыяльнай абароны насельніцтва Таджыкістана аб супрацоўніцтве ў галіне аховы здароўя. 

Таксама падпісана Пагадненне паміж БДМУ і таджыкскім дзяржаўным медуніверсітэтам аб акадэмічным і навуковым супрацоўніцтве.

14 мая Валерый Малашка і міністр аховы здароўя і сацыяльнай абароны насельніцтва Таджыкістана Насім Хаджа Алімзада правялі двухбаковую сустрэчу. Абмяркоўваліся абмен вопытам у галіне аховы здароўя, лячэнне таджыкскіх грамадзян у вядучых РНПЦ нашай краіны, навучанне таджыкскіх студэнтаў у беларускіх ВНУ, пастаўкі айчынных лекаў на таджыкскі рынак.

15 мая дэлегацыя Міністэрства аховы здароўя прыняла ўдзел у бізнес-форуме «Беларусь - Таджыкістан - Афганістан», у рамках якога генеральны дырэктар кіруючай кампаніі холдынгу «Белфармпрам» Валер Шаўчук выступіў з прэзентацыяй фармацэўтычнай галіны Беларусі. Прайшлі перамовы з найбуйнейшымі таджыкскімі і афганскімі фармацэўтычнымі кампаніямі.

У гэтыя дні ў Душанбэ праходзіць маштабная Нацыянальная выстава Беларусі, на якой прадстаўлены вядучыя фармацэўтычныя арганізацыі, вытворцы медыцынскага абсталявання і ўстановы аховы здароўя.

Анатоль Грушкоўскі, начальнік аддзела знешніх сувязяў Міністэрства аховы здароўя