Беларусь разлічвае нарасціць экспарт медпаслуг дзякуючы павелічэнню безвіза на 20%. Такім меркаваннем з карэспандэнтам БЕЛТА падзяліўся начальнік упраўлення прадпрымальніцкай дзейнасці, цэнаўтварэння і дзяржаўнай маёмасці Міністэрства аховы здароўя Дзмітрый Калістратаў.

"Мы разлічваем на далейшы прырост у першую чаргу дыягнастычных паслуг, кансультацыйнай медыцынскай дапамогі, высокатэхналагічных аперацый і іншых медыцынскіх паслуг. У гэтым годзе мы ставім сабе планку на 15-20% нарасціць аб'ём экспарту медыцынскіх паслуг", - сказаў Дзмітрый Калістратаў.

Экспарт медпаслуг у 2017 годзе вырас на 6,2%, гэта было дасягнута ў тым ліку за кошт увядзення пяцідзённага бязвізавага рэжыму. Геаграфія экспарту налічвае 114 краін, ёсць добры прырост па Вялікабрытаніі, Ірландыі, ЗША, Літве, Латвіі, Францыі, Кітаю.

"З прадаўжэннем тэрміну знаходжання замежных грамадзян на тэрыторыі Беларусі адкрыецца магчымасць пашырыць спектр медыцынскіх паслуг і тым самым павялічыць аб'ём паступленняў. Мы ставім сабе планку каля $ 40 млн зарабіць на экспарце медыцынскіх паслуг", - рэзюмаваў Дзмітрый Калістратаў.

У замежных грамадзян запатрабаваныя паслугі ў стаматалогіі, анкалогіі, афтальмалогіі, неўралогіі, кардыялогіі, траўматалогіі і іншых галінах. Па выніках 2017 года суб'екты гаспадарання незалежна ад формы ўласнасці аказалі меддапамогу замежнікам з 130 краін свету. Як распавяла начальнік аддзела экспарту медпаслуг Беларускай медыцынскай акадэміі паслядыпломнай адукацыі, кіраўнік праекта "Клінікі Беларусі" Вольга Харкава, у асноўным у Беларусь едуць грамадзяне з прымежных краін - Расіі, Украіны. Айчынныя медпаслугі запатрабаваныя таксама ў жыхароў Польшчы, Літвы, Латвіі, Казахстана, краін Блізкага Усходу.

Як паведамлялася, тэрмін бязвізавага знаходжання замежнікаў у Беларусі павялічаны да 30 сутак пры ўмове іх уезду і выезду праз Нацыянальны аэрапорт Мінск.

Пры сабе трэба мець пашпарт або дакумент які замяняе яго для выезду за мяжу, грошы (на кожны дзень знаходжання суму ў валюце або беларускіх рублях, эквівалентную не менш чым двум базавым велічыням альбо, калі знаходжанне складзе поўныя 30 дзён, 50 базавых велічынь), медыцынскі страхавы поліс, які дзейнічае ў Беларусі, на суму не менш за 10 тыс. еўра.

Пашырыць геаграфію спажыўцоў беларускіх медпаслуг плануецца за кошт кітайскіх грамадзян. У лістападзе пройдзе першая Кітайская міжнародная выстава імпарту, на якой у тым ліку будзе прэзентаваны сектар навукі і паслуг. "Мы будзем прадстаўляць кітайцам магчымасці беларускага медыцынскага турызму, сумяшчэння адпачынку і лячэння ў нашай краіне. Галоўным козырам будзе бязвізавае знаходжанне", - адзначыла Вольга Харкава.