Магчымасць сумеснай вытворчасці лекавых прэпаратаў абмяркоўвалася на сустрэчы пасла Беларусі ў Туркменістане Алега Табанюхава і кіраўніцтва ЗАТ "Беласептыка" з міністрам аховы здароўя і медыцынскай прамысловасці Туркменістана Нурмухамедам Аманепесавым.

Бакі абмеркавалі стан і перспектывы развіцця беларуска-туркменістанскага супрацоўніцтва ў галіне аховы здароўя, а таксама ў медыцынскай і фармацэўтычнай прамысловасці.

Адбылася прадметная размова аб узаемадзеянні ЗАТ "Беласептыка" з прадпрыемствамі кіравання "Туркмендермансенагат" Міністэрства аховы здароўя і медыцынскай прамысловасці Туркменістана. Бакі выказалі зацікаўленасць у арганізацыі ўзаемных паставак расліннай лекавай сыравіны, якая расце на тэрыторыі дзвюх краін, іншых прыродных і сінтэтычных кампанентаў для вытворчасці лекаў, а таксама гатовай прадукцыі медыцынскага прызначэння.

ЗАТ "Беласептыка" і кіраванне "Туркмендермансенагат" плануюць дэталёва прапрацаваць пытанне стварэння сумеснай вытворчасці прэпаратаў.

Па выніках праведзеных перагавораў бакі яшчэ раз пацвердзілі высокую зацікаўленасць у далейшым пашырэнні ўзаемавыгаднага супрацоўніцтва не толькі ў галіне ўзаемных паставак сыравіны і гатовай прадукцыі, але і развіцці вытворчай кааперацыі па выпуску тавараў для здароўя грамадзян дзвюх краін.

БЕЛТА