На аперацыйных сталах – двое дзяцей 6 і 8 гадоў. Розныя сем'і, розныя лёсы, а дыягназ аднолькавы – прыроджаная дэфармацыя пазваночніка. Праблема не толькі знешняя, але, і што важнейшае, пажыццёвая інваліднасць. Сёння ў Гомелі аперыравала брыгада хірургаў, анестэзіёлагаў-рэаніматолагаў і іншых спецыялістаў РНПЦ траўматалогіі і артапедыі, Гомельскай абласной бальніцы і Гомельскай абласной дзіцячай бальніцы на чале з галоўным пазаштатным дзіцячым траўматолагам-артапедам Міністэрства аховы здароўя Дзмітрыем Цесаковым.

Для таго каб такія аперацыі можна было ажыццявіць у Саюзнай дзяржаве распрацавалі сумесную праграму, якая атрымала скарочаную назву «Спінальныя сістэмы».

Медыкі-спецыялісты стварылі ўнікальную дыягнастычную платформу, якая ўключае комплекс клініка-прамянёвых, малекулярна-генетычных і біяхімічных крытэрыяў. Усё гэта дазваляе ацэньваць перспектыву развіцця дэфармацыі на ранніх этапах, каб вызначаць адэкватнае лячэнне і правесці, перш за ўсё, хірургічнае лячэнне такой прыроджанай дэфармацыі. У ходзе аперацыі ў пазваночнік устанаўліваецца спецыяльная металаканструкцыя: гэта беларуская распрацоўка, вырабленая з тытанавых сплаваў.

Прэс-служба Міністэрства аховы здароўя