Як паведаміў у сваім дакладзе на Форуме па пытаннях грамадскага здароўя галоўны дзяржаўны санітарны ўрач нашай краіны Аляксандр Тарасенка, у час пандэміі каранавіруснай інфекцыі санітарна-гігіенічная служба Беларусі прадэманстравала высокую эфектыўнасць.

Важнымі напрамкамі ў рамках аховы здароўя і, адпаведна, асноўнымі задачамі для кіраўнікоў медыцынскіх арганізацый былі і застаюцца:

• фарміраванне адказнага стаўлення да свайго здароўя;

• вядзенне здаровага ладу жыцця;

• карэкцыя і рэгулярны кантроль фактараў рызыкі інфекцыйных і неінфекцыйных захворванняў на папуляцыйным, групавым і індывідуальным узроўнях.

Пры гэтым Аляксандр Тарасенка падкрэсліў, наколькі важна для распрацоўкі мэтанакіраваных прафілактычных мерапрыемстваў у сферы грамадскага здароўя выяўляць і разумець фактары рызыкі.

Рэктар БелМАПА Аляксей Чуканаў адзначыў, што «здароўе нацыі – адна з прыярытэтных задач дзяржавы. А першасная прафілактыка – адзіны шлях вырашэння стратэгічнай задачы па захаванні і ўмацаванні здароўя насельніцтва краіны. У сістэме прафілактыкі ключавое значэнне набываюць гігіенічная навука і практыка як напрамак медыцыны, які дае магчымасць вырашыць ключавую задачу – мінімізацыю ці нават поўнае выключэнне тых фактараў, якія могуць негатыўна ўплываць як на асабістае, так і на грамадскае здароўе».

Мінімізацыя рызык звязана ў тым ліку з прадухіленнем неінфекцыйных захворванняў. Можна казаць аб метадычных падыходах да распрацоўкі крытэрыяльнага апарата ацэнкі эфектыўнасці мерапрыемстваў першаснай прафілактыкі, сучасных падыходах у палітыцы ўздзеяння на фактары рызыкі неінфекцыйных захворванняў з акцэнтам на фармаванне канцэпцыі зніжэння шкоды і вызначэнні ўзроўняў адказнасці. У рамках форуму эксперты і даследчыкі разгледзелі як частку механізму зніжэння рызыкі развіцця неінфекцыйных захворванняў асаблівасці прымянення ацэнкі і кіравання рызыкамі ў мікрабіялагічным аспекце забеспячэння харчовай бяспекі, а таксама пытанні дзяржаўнага рэгулявання нікатыназмяшчальнай прадукцыі ў Беларусі.

Беларусі трэба вывучаць сусветны вопыт, каб сфарміраваць уласную палітыку зніжэння і мінімізацыі шкоды, звязанай з неінфекцыйнымі захворваннямі. Прычым асобную ўвагу ў нацыянальнай палітыцы па зніжэнні рызыкі варта ўдзяліць спажыванню людзьмі цукру, солі, алкаголю і тытуню, а таксама выпрацаваць падыходы, якія дазволяць пераключыць спажыўцоў на прадукты з меншай рызыкай для здароўя. Такая палітыка павінна грунтавацца на міжнародных і нацыянальных даследаваннях і паўнацэннай доказнай базе.

За мінулыя гады Форум па пытаннях грамадскага здароўя заваяваў рэпутацыю аўтарытэтнай дыялогавай пляцоўкі для шырокага кола кіраўнікоў і спецыялістаў органаў і арганізацый аховы здароўя, прадстаўнікоў грамадскіх арганізацый, акадэмічнай і экспертнай супольнасці, а таксама бізнесу.

Прэс-служба Міністэрства аховы здароўя