У ходзе наведвання экспазіцыі з навінкамі пазнаёміліся намеснік міністра аховы здароўя Барыс Андрасюк і старшыня Камітэта па ахове здароўя Мінска Ігар Юркевіч. Яны адзначылі, што ў гэтым годзе арганізатарам выставы ўдалося значна пашырыць спектр беларускіх вытворцаў і распрацоўшчыкаў медыцынскай прадукцыі. Асаблівую ўвагу прыцягнула навінка цяперашняга сезона – агульны стэнд «Сталічная ахова здароўя». На асобнай лакацыі ў цэнтры залы – гарадскія клінічныя бальніцы № 1, 2, 5, 6, 10, радзільны дом № 2, гарадскі анкацэнтр, БДМУ і МНПЦ хірургіі, транспланталогіі і гематалогіі. Тут можна атрымаць кансультацыю ці запісацца на прыём да адмыслоўца.

У выставе бяруць удзел прадстаўнікі кампаній з Беларусі, Турцыі, Венгрыі, Расіі, Ірана, Нідэрландаў. У праграме – некалькі цікавых практыкумаў для спецыялістаў. У тым ліку канферэнцыя «Восеньская школа пульманолага», семінар-практыкум «Алгарытм даўгалецця», цыкл семінараў па пытаннях выкарыстання сучаснага бальнеялагічнага абсталявання і сродкаў рэабілітацыі. Для спецыялістаў арганізаваны воркшоп «Медыцынскі і аздараўленчы турызм» з удзелам кампаній, якія прадстаўляюць медыцынскі турызм у РБ, РФ, Казахстана, Узбекістана, Турцыі, Ірана і інш.

Прэс-служба Міністэрства аховы здароўя