Па ейных словах, «гэта доўгі вытворчы працэс, які складаецца з некалькіх этапаў. Першы – мадэрнізацыя восьмага паверха існуючай вытворчасці на "БелВітуніфарм", пасля гэтага будзе пабудаваны будынак для вытворчасці вялікіх аб'ёмаў вакцыны. Паралельна мы вядзём вялікі навуковы праект, дзякуючы якому зможам правесці даклінічныя і клінічныя даследаванні і зарэгістраваць вакцыну. Ужо атрыманы прататып, адпрацаваны штамы, якія ўвойдуць у вакцыну. Вядома ж, правяраецца эфектыўнасць узораў».

Маргарыта Досіна таксама адзначыла, што «айчынная вакцына нам патрэбная – гэты праект дазволіць сфарміраваць навуковую школу. Навукоўцы змогуць навучыцца хутка рэагаваць на новыя выклікі. Сёння на рынку шмат вакцын, але мы зробім наш аналаг, які павінен быць роўны па эфектыўнасці лепшым узорам іншых краін. А па кошце, натуральна, танней. Гэта дасць магчымасць вакцынаваць больш пацыентаў. Нашая вакцына будзе прызначаная для беларусаў, але ніхто не забараняе выходзіць на экспарт. Мы будзем праводзіць той аб'ём выпрабаванняў, які дазволіць выйсці на экспарт».

Як расказаў генеральны дырэктар РУП «Белмедпрэпараты» Сяргей Бяляеў, плануецца, што беларускую вакцыну пачнуць вырабляць у 2022 годзе. Вядома ж – гэтыя партыі пойдуць на даклінічныя і клінічныя даследаванні. «Мы сумесна з «БелВітуніфарм» стварылі прадпрыемства, галоўная мэта якога – вытворчасць беларускай вакцыны супраць каранавіруса. На першым этапе гэты працэс будзе складацца з дзвюх стадый: вытворчасць актыўнага кампанента будзе ажыццяўляцца на «БелВітуніфарм», а вытворчасць гатовай вакцыны – на магутнасцях «Белмедпрэпаратаў». Другі этап – праектаванне і будаўніцтва вытворчага комплексу, які будзе вырабляць вакцыну па поўным цыкле – гэта плануецца да 2023-2024 года. Першы этап запускаем у наступным годзе: вакцына пойдзе на даклінічныя і клінічныя даследаванні. Каб даказаць яе бяспеку і ацаніць эфектыўнасць», – сказаў ён.

Паводле слоў намесніка дырэктара па навуковай рабоце РНПЦ эпідэміялогіі і мікрабіялогіі Аліны Дронінай, «цяпер, у рамках навуковай працы, спецыялісты РНПЦ эпідэміялогіі і мікрабіялогіі сумесна з Інстытутам біяфізікі НАН распрацоўваюць прататып (кандыдатны варыянт) інактываванай вакцыны супраць каранавіруса. Ужо атрымана эксперыментальная партыя, ёсць папярэднія дадзеныя аб тым, што прэпарат бяспечны і імунагенны. Да канца года будзе завершана распрацоўка лабараторнага рэгламенту. У наступным годзе мы павінны перадаць тэхналогію вытворцу. Затым будзе атрымана доследна-прамысловая партыя, якая пройдзе выпрабаванні – завершыцца ўсё рэгістрацыяй і прымяненнем вакцыны».

Вытворчая база ААТ «БелВітуніфарм» вызначана ўрадам як найбольш перспектыўная пляцоўка для доследна-прамысловай вытворчасці вакцыны, зыходзячы са ступені гатоўнасці інфраструктуры, наяўнасці падрыхтаваных спецыялістаў, а таксама магчымасці далейшага развіцця біятэхналагічнага кластара. Распрацоўка айчыннай вакцыны вядзецца падведамаснымі Міністэрству аховы здароўя і Нацыянальнай акадэміі навук арганізацыямі. Цяпер падрыхтавана серыя прататыпнага варыянту вакцыны. Указам прадугледжваецца вызваленне тэхналагічнага абсталявання, сыравіны і матэрыялаў, якія ўвозяцца на тэрыторыю краіны для рэалізацыі інвестыцыйнага праекта, ад абкладання ўвазнымі мытнымі пошлінамі і падаткам на дабаўленую вартасць.

Прэс-служба Міністэрства аховы здароўя