На ўрачыстым мерапрыемстве, якое адбылося сёння ў Лунінецкай ЦРБ, было адзначана, што ў 2010 годзе з РНПЦ траўматалогіі і артапедыі ў Лунінецкую ЦРБ быў перададзены КТ-апарат. Ён прапрацаваў тут больш за дзесяць гадоў. У мінулым годзе пасля таго, як апарат выпрацаваў свой рэсурс, было прынята рашэнне аб замене яго на больш сучасны тамограф, а таксама аб адпаведнай мадэрнізацыі КТ-кабінета.

Мадэрнізавалі кабінет за кошт мясцовага бюджэту, будаўнічыя работы абышліся ў Br187 тыс. Тамограф коштам больш як Br1,2 млн набыты за кошт Міністэрства аховы здароўя.

Гэта КТ-апарат вытворчасці фірмы «Адані» VENTUM-128. Ён дазваляе выконваць дыягностыку галавы, унутраных органаў, анкапошук. «Вельмі важна, што апарат дазваляе з высокай дакладнасцю праводзіць дыягностыку захворванняў на ранніх стадыях. Асабліва пры каранавіруснай інфекцыі важная тамаграфія лёгкіх: глядзіцца ступень паразы ў працэнтных суадносінах. Пакуль у Лунінцы не было апарата КТ, пацыентаў адпраўлялі на дыягностыку ў Пінск і Столін», – адзначыла галоўны ўрач ЦРБ Святлана Хлебус.

Як распавёў на ўрачыстым мерапрыемстве намеснік міністра аховы здароўя Барыс Андрасюк, «канкрэтна для Лунінца гэта не апошняе набыццё. Сюды будзе пастаўлена яшчэ абсталяванне – рэанімабіль высокага класа, шэраг апаратаў ШВЛ высокага і экспертнага класаў. Іх ужо закупілі на міжнародных пляцоўках, ідзе пастаўка. Усяго па краіне ў 2022-2023 гадах плануем абсталяваць 28 аб'ектаў рэспубліканскага і абласнога значэння».

Ва ўрачыстым адкрыцці абноўленага кабінета камп'ютарнай тамаграфіі прынялі ўдзел: старшыня Брэсцкага абласнога Савета дэпутатаў Юрый Наркевіч, намеснік міністра аховы здароўя Барыс Андрасюк, начальнік галоўнага ўпраўлення па ахове здароўя Брэсцкага аблвыканкама Віктар Міхайлоўскі, а таксама кіраўнік Лунінецкага раёна Аляксандр Пачко.

У Брэсцкай вобласці ў 2021 годзе на медыцынскае аснашчэнне было накіравана амаль Br22 млн. Асаблівы акцэнт зроблены на рэанімацыйным абсталяванні. У прыватнасці, закуплены 124 гемадынамічных манітора, 42 апараты ШВЛ, 48 апаратаў УГД, 29 эндаскапічных сістэм, 80 адзінак лабараторнага абсталявання. За кошт рэспубліканскага бюджэту ў Брэсцкую дзіцячую абласную бальніцу паставілі магнітна-рэзанансны тамограф. Аўтапарк папоўнілі 39 машын, у тым ліку 22 для хуткай меддапамогі. Абнаўленне матэрыяльна-тэхнічнай базы працягваецца. Напрыклад, у Брэсцкай цэнтральнай гарадской бальніцы мадэрнізуюць сістэму падачы кіслароду, будзе ўстаноўлены стацыянарны газіфікатар на 10 т., а для Столінскай райбальніцы ў маі плануецца закупка аўтамабіля хуткай меддапамогі.

Прэс-служба Міністэрства аховы здароўя