«Мне б вельмі хацелася, каб усе цёплыя і прыемныя словы, якія прагучалі сёння са сцэны, а таксама ўся святочная атмасфера свята была апавяданнямі і фатаграфіямі перададзена ва ўсе калектывы краіны – ад маленькіх паліклінік і ФАПаў да буйных цэнтраў, ва ўсе цэнтры санітарнай службы, ва ўсе РНПЦ і фармпрадпрыемствы. Каб да кожнага члена нашага вялікага калектыву даходзілі святло, цяпло і падзяка напярэдадні свята», – сказаў міністр.

Дзмітрый Піневіч падкрэсліў, што «ў краіне каля 300 тыс. медыцынскіх работнікаў, з іх 45 тыс. практыкуючых урачоў, 115 тыс. медсясцёр і братоў. Хочацца верыць, што часы пандэміі прайшлі, хаця многія законы мяняюцца – калі не фізікі, то, прынамсі, эпідэміялогіі».

Міністр з вялікай цеплынёй падзякаваў урачам-ветэранам і ўрачам-настаўнікам. Пры гэтым ён падкрэсліў, што «памяць аб калегах, якіх мы страцілі ў барацьбе з пандэміяй, дае нам наймагутнейшы стымул рухацца наперад, выконваючы наш абавязак».

Дзмітрый Піневіч нагадаў прысутным, што «Кіраўнік дзяржавы 30 разоў быў у чырвоных зонах. І кожны ўваход у чырвоную зону бальнiцы суправаджаўся выразнымі і цвёрдымі ўказаннямі па ўдасканаленні нашай сістэмы. Гэта дорага каштуе, такога нідзе няма! Сёння адбылася справаздача Прэзідэнту па тэме развіцця біятэхналогій. Яшчэ ў час наведвання Прэзідэнтам РНПЦ анкалогіі і медыцынскай радыялогіі мы расказалі аб нашых дасягненнях. Менавіта там былі абмеркаваны прапановы па развіццю біятэхналагічнага кірунку».

Міністр аховы здароўя таксама адзначыў, што «сёння адбылася яшчэ адна не менш важная падзея: Кіраўніком дзяржавы прынята рашэнне аб павышэнні заробкаў усім медыцынскім работнікам. Дадзена даручэнне Ураду і Савету Рэспублікі. Сёння Аляксандр Рыгоравіч прасіў перадаць, што рашэнне прынятае. Гэта вельмі важна для захавання нашага прафесіяналізму, нашых кадраў».

Завяршаючы выступленне, Дзмітрый Піневіч падкрэсліў, што «103 гады беларускай сістэме аховы здароўя – гэта не гісторыя, 103 – гэта тут і цяпер, аператыўнасць і будучыня. Яшчэ раз дзякую ўсім за працу і жадаю ўсяго самага лепшага!»

Напярэдадні прафесійнага свята ў Палацы Рэспублікі адбылася цырымонія ўзнагароджання пераможцаў конкурсу «Урач года Рэспублікі Беларусь», а таксама ўручэнне ўзнагарод Адміністрацыі Прэзідэнта Рэспублікі Беларусь, Савета Рэспублікі Нацыянальнага сходу, Урада, Міністэрства аховы здароўя і прафсаюзаў.

На святочны канцэрт, які прайшоў пасля цырымоніі ўзнагароджання, былі запрошаны больш за 2,5 тыс. работнікаў устаноў аховы здароўя Беларусі. У Палацы Рэспублікі пабывалі ўрачы, фельчары, медсёстры, ветэраны працы галіны і будучыя медыкі – прадстаўнікі адной вялікай згуртаванай каманды медработнікаў усёй краіны. Людзі, для якіх медыцына – не проста прафесія, а характар, лад жыцця, вернасць свайму шляху. Бо кругласутачная барацьба за здароўе і жыццё пацыентаў – гэта заўсёды больш, чым праца.