У сістэме ўзмоцнена работа амбулаторна-паліклінічнага звяна: пашыраны «чырвоныя» зоны ў паліклініках, павялічана колькасць кабінетаў, якія ажыццяўляюць прыём пацыентаў у «чырвоных» зонах, прадоўжаны рэжым работы ўсяго амбулаторна-паліклінічнага звяна на выхадныя дні – суботу і нядзелю. Да працы з пацыентамі ў «чырвоных» зонах і выязных кантактных брыгадах прыцягнуты студэнты 6-х курсаў медыцынскіх універсітэтаў і лекары-інтэрны.

На сённяшні дзень 2 тыс. 470 студэнтаў старэйшых курсаў медыцынскіх універсітэтаў накіраваны ў паліклінікі і бальніцы, каб дапамагаць у лячэнні пацыентаў з каранавіруснай інфекцыяй. Практычнаму звяну аховы здароўя дапамагаюць – 1 тыс. 228 старшакурснікаў БДМУ, 276 – ВДМУ, 440 – Гомельскага і 526 Гродзенскага медуніверсітэта. На дапамогу ўрачам прыйшлі студэнты старэйшых курсаў, якія навучаюцца на спецыяльнасцях «Лячэбная справа», «Педыятрыя», «Медыка-псіхалагічная справа», «Стаматалогія», «Фармацыя», «Медыка-прафілактычная справа».

Студэнты і ўрачы-інтэрны працуюць не толькі ў стацыянарах, паліклініках, і хуткай, але і дапамагаюць спецыялістам у кол-цэнтрах, прымаюць званкі ў рэгістратуры. Студэнты таксама аказваюць дапамогу мабільным брыгадам, якія выязджаюць дамоў да пацыентаў, працуюць у клініка-дыягнастычных лабараторыях, у прышчэпачных кабінетах.

Такая практыка існавала і раней у медыцынскіх універсітэтах: увесну ці ўвосень, падчас сезоннага ўздыму захворванняў студэнты таксама актыўна дапамагалі лекарам.