Рэспубліканская навукова-практычная канферэнцыя «Мультыдысцыплінарны падыход да праблемы болю»

Актуальнасць праблематыкі канферэнцыі абумоўлена шэрагам прычын. Спецыялісты ўсяго свету абмяркоўваюць тэму пандэміі болю. Даследаванні па пытаннях болевых сіндромаў рознай этыялогіі праводзяцца ва ўсім свеце. Напрыклад, медыцынская база Pubmed па запыце «Pain» выдае спасылкі на 500 тыс. літаратурных крыніц за апошнія 10 гадоў. Болевымі сіндромамі пакутуюць да 64% усяго насельніцтва планеты (Міжнародная асацыяцыя па вывучэнні болю, 2015). Выдаткі на лячэнне болевых сіндромаў пераўзыходзяць сукупныя выдаткі на лячэнне хвароб сэрца, раку і дыябету разам узятыя.

Навуковыя напрамкі работы канферэнцыі:

болевыя сіндромы ў практыцы ўрачоў розных спецыяльнасцей;
хранічныя болевыя сіндромы цэнтральнага генезу;
мультыдысцыплінарны падыход у рэабілітацыі хранічных болевых сіндромаў і новыя метады лячэння;
хірургічнае лячэнне хранічных болевых сіндромаў.

У ходзе канферэнцыі заслухана 15 дакладаў вядучых спецыялістаў Беларусі ў галіне медыцыны болю. Да іх далучыліся спецыялісты-алголагі з РНПЦ неўралогіі і нейрахірургіі і Беларускай акадэміі паслядыпломнай адукацыі.

У канферэнцыі вочна прынялі ўдзел больш за 100 урачоў розных спецыяльнасцей з Беларусі, аўдыторыя была значна пашырана за кошт анлайн-трансляцыі, на якую зарэгістраваліся больш за 300 спецыялістаў.

Эксперты абмеркавалі пытанні тэарэтычнага і прыкладнога характару, звязаныя са складанымі пытаннямі падыходаў да дыягностыкі і лячэння болевых сіндромаў урачамі розных спецыяльнасцей.

Прэс-служба Міністэрства аховы здароўя

13.05.2022

107