Усяго размеркаванню або накіраванню на працу сёлета падлягаюць 452 студэнтаў Гродзенскага дзяржаўнага медыцынскага ўніверсітэта. Сёння са сваімі будучымі кіраўнікамі знаёміліся 77 студэнтаў педыятрычнага, 42 студэнта медыка-псіхалагічнага і 38 студэнтаў медыка-дыягнастычнага факультэтаў. Самы шматлікі – лячэбны факультэт, на сваё першае працоўнае месца адправяцца 295 яго выпускнікоў, у гэтых студэнтаў прадразмеркаванне адбудзецца заўтра.

Удзел у размеркаванні па традыцыі прынялі прадстаўнікі Міністэрства аховы здароўя, галоўных упраўленняў аховы здароўя Брэсцкага і Гродзенскага аблвыканкамаў, камітэта па ахове здароўя Мінскага гарвыканкама і іншых рэгіёнаў, а таксама галоўдоктары медыцынскіх устаноў.

«Кампанія папярэдняга размеркавання традыцыйна праходзіць у тры этапы. Першы – на ўзроўні ўніверсітэта і дэканатаў, другі – сустрэча выпускнікоў з патэнцыйнымі наймальнікамі. Трэці, канчатковы этап, праходзіць з удзелам міністра аховы здароўя. Як і ў папярэднім годзе, улічваем пажаданні выпускнікоў, магчымасці наймальнікаў, а таксама ўклад студэнтаў у барацьбу з пандэміяй», – распавяла начальнік галоўнага ўпраўлення арганізацыйна-кадравай працы Міністэрства аховы здароўя Рэспублікі Беларусь Вольга  Калюпанава.