Першы прарэктар медуніверсітэта Віталь Вараб'ёў прадставіў даклад аб выніках навучальнай, навукова-даследчай, ідэалагічнай і выхаваўчай работы, дзейнасці клінічных кафедр у аказанні медыцынскай дапамогі насельніцтву ў 2021 годзе.

Больш падрабязна ён спыніўся на падрыхтоўцы высокакваліфікаваных медыцынскіх кадраў, міжнароднай дзейнасці і экспарце паслуг, практычнай дапамогі ўстановам аховы здароўя падчас пандэміі. Дарэчы, з 1 лютага больш за 200 студэнтаў-шасцікурснікаў усіх факультэтаў ГрДМУ прыступілі да аказання дапамогі практычнай ахове здароўя. З наступнага тыдня студэнты ГрДМУ, якія жывуць у Брэсцкай вобласці, накіруюцца ва ўстановы аховы здароўя гэтага рэгіёна. Супрацоўнікі кафедраў агульнай урачэбнай практыкі і паліклінічнай педыятрыі таксама ўдзельнічаюць у аказанні дапамогі і знаходзяцца на прыёме ў паліклініках.

«Мы падтрымліваем трэнд на практыкаарыентаванасць і лічым яго асноўным у павышэнні якасці адукацыі. Нашы студэнты практыкуюць сімуляцыйныя тэхналогіі і асвойваюць цэлы шэраг медыцынскіх маніпуляцый на спецыяльных трэнажорах і манекенах. Яшчэ адзін прыярытэт – развіццё міжнароднай дзейнасці. Мы робім акцэнт на навучанні замежных навучэнцаў, бо гэта не толькі фінансавая падтрымка адукацыі, але і міжнародныя кантакты, магчымасць вывучаць досвед іншых краін і перадаваць свой», – сказаў Віталь Вараб'ёў.

Сярод асноўных задач, якія трэба рэалізаваць у гэтым годзе: удасканаленне матэрыяльна-тэхнічнай базы універсітэта, уключаючы будаўніцтва новага корпуса, капітальны рамонт існуючых навучальных карпусоў, укараненне новых адукацыйных стандартаў пакалення 3+, выкананне планавых паказчыкаў аказання платных адукацыйных паслуг, экспарту адукацыйных паслуг і іншыя.

Падводзячы вынікі працы ўніверсітэта ў 2021 годзе, намеснік міністра Барыс Андрасюк адзначыў, што «акрамя будаўніцтва новага навучальнага корпуса ёсць неабходнасць і ў пашырэнні базы студэнцкіх інтэрнатаў. Звязана гэта з вялікай колькасцю іншагародніх і замежных студэнтаў, якія вучацца ва ўніверсітэце». Таксама намеснік міністра аховы здароўя расказаў аб будаўніцтве анкадыспансера на базе абласной бальніцы і падкрэсліў, што ён будзе аснашчаны самым высокатэхналагічным абсталяваннем сусветнага класа. Ангіяграфічнымі комплексамі і сучасным рэнтгендыягнастычным абсталяваннем аснасцяць і ўніверсітэцкую клініку.

Людміла Кеда падкрэсліла, што тыя вынікі, якія паказвае ахова здароўя Гродзенскай вобласці, шмат у чым залежаць ад дзейнасці Гродзенскага медуніверсітэта, і падзякавала калектыву ВНУ за сумесную работу, адзначыўшы поўнае ўзаемадзеянне навуковай і практычнай аховы здароўя нашай вобласці.

Урачыстым момантам пасяджэння стала ўзнагароджанне супрацоўнікаў ГрДМУ, прымеркаванае да Дня беларускай навукі, а таксама па выніках працы ў 2021 годзе. Больш за 20 загадчыкаў кафедр, выкладчыкаў, начальнікаў аддзелаў і спецыялістаў падраздзяленняў атрымалі Ганаровыя граматы і Падзячныя пісьмы Міністэрства аховы здароўя, Гродзенскага абласнога і гарадскога выканаўчых камітэтаў, Гродзенскага абласнога Савета дэпутатаў, а таксама Гродзенскага дзяржаўнага медыцынскага ўніверсітэта.

Прэс-служба Міністэрства аховы здароўя
Фота прадастаўлены ГрДМУ