У ходзе наведвання будаўнічага аб'екта Дзмітрый Піневіч паставіў жорсткую задачу перад кіраўніцтвам акадэміі і будаўнікамі па ўвядзенні ў эксплуатацыю сімуляцыйнага цэнтра да канца кастрычніка бягучага года. Нагадаем, што на базе БелМАПА плануецца стварыць унікальны для Беларусі цэнтр прафесійнага развіцця ўрачоў-спецыялістаў самага высокага класа па 9 напрамках, у тым ліку па акушэрстве, тэрапіі, хірургіі, хуткай медыцынскай дапамозе і іншых спецыяльнасцях. Навучанне будзе праводзіцца на сімулятарах сусветнага класа.

Рэктару акадэміі Аляксею Чуканаву была пастаўлена задача не толькі арганізаваць працэс павышэння кваліфікацыі на сімуляцыйным абсталяванні, але і распрацаваць сістэму атэстацыі медыцынскіх работнікаў у рамках 160-гадзіннай падрыхтоўкі, прадугледжанай пастановай Міністэрства аховы здароўя ад 28 мая 2021 г. № 70.

Стаiць задача распрацаваць сістэму здачы кваліфікацыйнага экзамену пры прыёме медыцынскага работніка на працу ў арганізацыю аховы здароўя. І ўкараніць сістэму тэсціравання медыкаў пры прыёме на працу. Плануецца, што медыцынскія спецыялісты будуць здаваць іспыты з выкарыстаннем практычных навыкаў, якія пацвярджаюць кампетэнцыі для працы на новай пасадзе. У далейшым гэта прывядзе да акрэдытацыі кожнага ўрача - спецыяліста, што ў сваю чаргу дасць магчымасць забяспечыць якасць медыцынскай дапамогі.

Асвойваць практычныя навыкі з выкарыстаннем сімуляцыйнага абсталявання, у віртуальных клініках цэнтра, будуць:

• слухачы акадэміі - па дысцыплінах навучальных планаў і спецыяльнасцях перападрыхтоўкі, у адпаведнасці з тэматыкай навучальных заняткаў павышэння кваліфікацыі;

• клінічныя ардынатары акадэміі - па адпрацоўцы практычных навыкаў у адпаведнасці з праграмай падрыхтоўкі ў клінічнай ардынатуры;

• прафесарска-выкладчыцкі склад устаноў адукацыі і высокакваліфікаваныя спецыялісты арганізацый аховы здароўя;

• работнікі сістэмы Міністэрства абароны, Міністэрства ўнутраных спраў, Міністэрства па надзвычайных сітуацыях і іншыя катэгорыі грамадзян па пытаннях аказання першай медыцынскай дапамогі насельніцтву, у тым ліку пры надзвычайных сітуацыях.

Прэс-служба Міністэрства аховы здароўя